Últimos díes p’apuntase al taller de Wikipedia n’asturianu

En asturiano:

El Conceyu de Xixón, nel marcu del Festival Arcu Atlánticu, pon a disposición de la ciudadanía un taller de Wikipedia n’asturianu que se va celebrar los díes 26 y 27 de xunetu.

El formador del mesmu va ser Víctor Suárez Piñero, alministrador y divulgador del proyeutu d’enciclopedia llibre n’Asturies, que va impartir esti taller de cuatro hores dividíu en dos díes. Nél los asistentes van poder deprender a crear artículos pal proyeutu, que yá cuenta con más de 46 000 artículos na so versión asturiana y que lu alluga nel puestu 78 de los 290 idiomes nos que trabaya en Wikipedia.

Real_Instituto_Jovellanos_3

Centru de Cultura Antiguu Institutu, Nwalme, CC BY-SA

El taller, entamáu pola actividá Arcu Lliterariu qu’organiza l’Asociación Cultural L’Arribada, va celebrase nel aula 1 del xixonés Centru de Cultura Antiguu Institutu el martes 26 y miércoles 27, a les 19.30 hores. La inscripción ye de baldre cola tarxeta ciudadana de Xixón nes oficinas d’atención al ciudadanu, caxeros ciudadanos o na web d’actividaes de Xixón, y el requisitu únicu ye tener más de 16 años y l’últimu día pa formalizala ye esti vienres 22.

Víctor Suárez
Socio de Wikimedia España